Ердоган вели дека Ерменија ќе има последици по „неприфатливиот однос“ кон Азербејџан
Турскиот претседател Реџеп Таип Ердоган денеска изјави дека „односот на Ерменија кон Азербејџан е неприфатлив“ и дека земјата поради тоа ќе има последици.
„Сметаме дека ситуацијата што настана се должи на неприфатливото ерменско кршење на договорот постигнат по војната во 2020 година, што резултираше со победа на Азербејџан“, рече Ердоган во Анкара, откако беа обновени пограничните судири меѓу двете кавкаски земји во спорната област Нагорно Карабах, а во двата дена борбите имаше десетици загинати војници на двете страни.
Ерменија и Азербејџан си ја префрлаат одговорност околу избувнувањето на новиот конфликт.
Во Ереван беше објавено дека азербејџанските војници ја гранатирале територијата на Ерменија со артилериско оружје и со помош на беспилотни летала. Според ерменските влати, биле нападнати неколку погранични области.