ЕП 2024, Марко Митев: Ќе го оставиме срцето на теренот за позитивен резултат против Германија
Најдобрата македонска ракометна репрезентација е во Берлин каде в недела од 20.30 часот ќе го игра својот втор натпревар на Европското првенство против домаќинот Германија.
По стартниот пораз од Франција во Диселдорф, избраниците на селекторот Кирил Лазаров се фокусираат на следниот голем предизвик. Играчите тренираа во „Мерцедес-Бенц Арена“ (капацитет 14,800 места) која се очекува да биде исполнета до последно место.
Ракометарот на Алкалоид, средниот бек Марко Митев настапи против француската селекција постигнувајќи три голови.
– Во арената е прекрасно, има голема арена пред нас тука, се очекува да биде полна со домаќинот. Целиот тим е подготвен за натпреварот и се надеваме на позитивен резултат. Германија е квалитетна репрезентација, ќе се бориме, ќе го дадеме нашиот максимум, ќе го оставиме срцето на теренот до последната секунда на мечот – вели Митев.
Пред натпреварот Македонија – Германија, од 18.00 часот ќе играат репрезентациите на Франција и Швајцарија.