Ракометната репрезентација на Австрија испадна од трката да се најде меѓу првите две позиции од групата „1“ во главната фаза на Европското првенство.

Австријците, кои беа едни од најголемите изненадувања на шампионатот, загубија денеска од Исланд со 26:24.

Во победничките редови доминираше Гудјонсон со девет погодоци, седум запиша Палмарсон. На спротивната страна седум голови забележа Вагнер.

Доколку триумфираше Австрија, ќе требаше да чека порази на главните конкуренти Германија и Унгарија за да се најде на втората позиција.

Веќе се знае дека Франција која го освои првото место во групата „1“ во полуфиналето ќе игра против второпласираната од групата „2“, Шведска.

Второпласираната од групата „1“ и ривалот на Данска во борбата за медали ќе се дознае по вечерашните дуели: Франција – Унгарија (18.00 часот) и Германија – Хрватска (20.30 часот).