Тенисерот Енди Мари преку социјалните мрежи изрази желба да ја замени шкотската премиерка Никола Старџн, откако таа неодамна најави дека е време да се повлече од функцијата.

Медиумите оваа изјава на Мари ја протолкуваа како шега, а истото тоа го стори и премиерката.

– Интересна позиција. Имав намера да се посветам на политиката кога ќе престанам да играм – објави Мари на „твитер“, коментирајќи го заминувањето на Старџн.

Таа веднаш реагираше на „твитот“, со свој шеговит коментар.

– Знам дека најавив оти нема да посочам никого како мој наследник, но… – коментираше Старџн на „твитер“.

Сепак изгледа Мари се уште нема намера да се откаже од спортската кариера. Тој стигна до третата рунда на Австралија опен, со што покажа дека се уште може да игра на врвно ниво.

Мари неодамна ја доби хуманитарната награда „Артур Еш“, вторпат. Сите средства што ги доби (над 500.000 фунти), ги даде за жртвите на војната во Украина.