Државниот архив и Народната банка заеднички ќе го истражуваат архивскиот материјал значаен за централнобанкарското работење
Државниот архив и Народната банка ја прошируваат меѓусебната соработка во областа на истражувањето, собирањето, обработувањето, евидентирањето, чувањето и промовирањето на архивскиот материјал значаен за централнобанкарската историја, за финансиските состојби, за развојот на банкарството и економијата на нашата земја.
По тој повод, како што соопштија од Државниот архив, потпишан е меморандум за соработка, кој ќе се преточи во истражување и дигитализација на архивски материјали кои се однесуваат на банките и банкарските организации, значајни за стопанскиот и економскиот развој на Македонија, заедничко организирање изложби и други активности од научнoистражувачката и едукативната област, издавање заеднички публикации и книги во издание на страните потписнички, како и заедничко организирање и реализација на научноистражувачка работа во архивски институции во странство, заради лоцирање, евидентирање и дигитализирање на архивскиот материјал значаен за нашиот стопански и економски развој.
Меморандумот го потпишале директорот на Државниот архив Емил Крстески и гувернерката на Народна банка на Република Северна Македонија Анита Ангеловска Бежоска.