По обвинувањата од дваесетина жени дека со децении сексуално ги вознемирувал, Пласидо Доминго пoднесе оставка од функцијата генерален директор на Операта на Лос Анџелес и се повлече од сите закажани настапи.

Неколку жени го обвинија Доминго дека ја користел моќта на Операта за да ги принуди на сексуални односи, а некои го обвинуваа за вознемирување, недолично сексуално однесување и дека во некои случаи ја користел својата позиција за да им наштети на кариерата.

„Операта во Лос Анџелес ми е многу мила и мојата работа таму ја сметам како една од моите најважни наследства“, рече 78-годишниот Доминго, кој помогна да се основа компанијата и да го стекне меѓународното реноме.

„Неодамнешните обвинувања против мене создадоа атмосфера во која е компромитирана мојата способност да ѝ служам на компанијата“, додава познатиот тенор во оставката, а вели и дека ќе продолжи да работи за да го „исчисти“ своето име.

Претходно и Операта Метрополитен во Њујорк по 51 година ја раскина соработката со прославениот тенор.