Демант од Амбасадата на Кралството Холандија во Скопје: Неоснована и лажна е веста за холандска поддршка на бугарското вето
Неоснована и лажна е веста што излезе во некои медиуми во текот на вчерашниот ден дека Холандија ја поддржила Бугарија во блокадата на преговарачката рамка за почеток на пристапните преговори меѓу Северна Македонија и Европската Унија (ЕУ), се вели во реакцијата на Амбасадата на Кралството Холандија во Скопје.
Од таму потсетуваат на одлуката на холандската Влада од 30 октомври оваа година со која се информирал тамиошниот парламент дека првата меѓувладина конференција за Северна Македонија може да се одржи.
– Овој став останува, се разбира, непроменет. Холандија сметаше и сѐ уште смета дека Северна Македонија има постигнато добар напредок и дека меѓувладината конференција може да се одржи веднаш штом се усвои преговарачката рамка, порачуваат од холандската амбасада во земјава.