Министерството за надворешни работи на Бугарија започна со работа на креирање мобилна апликација за помош на Бугарите во странство, соопшти прес-центарот на МНР.

Апликацијата ќе дава информации во реално време за ризиците при патување во странство и ќе помогне за брзо поврзување со Центарот за управување со кризи при Министерството за надворешни работи.

Обезбедена е и функционалност за доставување сигнал за помош или евакуација на бугарските државјани погодени од катастрофи во странство.

Иницијативата се спроведува во партнерство со Министерството за надворешни работи на Кралството Норвешка во рамките на проектот „Доизградба и опремување на Центарот за управување со кризи во Министерството за надворешни работи на Република Бугарија”, користејќи долгогодишно норвешко искуство во областа.

Во следните 21 месец, во кои ќе се реализира проектот, планирани се и други заеднички активности со норвешката страна. Меѓу нив се семинари за размена на искуства за управување и справување со различни кризи, подобрување на знаењата за одговор на кризи, итни случаи, евакуации и друго.

Проектот „Доизградба и опремување на Центарот за управување со кризи во Министерството за надворешни работи на Република Бугарија” е финансиран од Фондот за билатерални односи во рамките на Норвешкиот финансиски механизам / 2014 – 2021 година.

Извор: МИА