Блокотехна во финалето на БИБЛ лигата
Екипата на Блокотехна обезбеди пласман во финалето на БИБЛ лигата откако во полуфиналната пресметка го совлада бугарскиот тим Академик Бултекс со 79:74 на завршниот Ф4 турнир кој се игра во Приштина. Противник на македонскиот тим ќе биде организаторот на турнирот, екипата на Теута која во второто полуфинале беше поуспешна од Берое победувајќи со 80:68.
Иако Блокотехна во Приштина допатува без неколку стандардни првотимци, избраниците на Марјан Илиевски одиграа одлично и во неизвесна завршница дојдоа до победата и прв пласман во финалето.
Бугарскиот тим подобро го започна натпреварот, брзо дојде до предност која ја одржуваше до крајот на полувремето кога Блокотехна со серија од 5:0 дојде до водство со кое замина на одмор (41:40).
Во второто полувреме, резултатската неизведност беше присутна до самиот крај но овој пат кошаркарите на Блокотехна ја имаа контролата врз резултатот и во пенал завршница дојдоа до победата вредна финале.
Младеновиќ со 22 поени беше најпрецизен во редовите на Блокотехна, а одлично одиграа и Пен со 18 и Глигоријевиќ со 17 поени.
Финалниот натпревар се игра утре со почеток во 19 часот.