САД се надеваат на постабилни и попрофитабилни односи со Русија, но ако таа продолжи да „напаѓа” тогаш Вашингтон ќе одговори, изјави денеска американскиот државен секретар Ентони Блинкен во интервју за римскиот дневен весник „Ла Република”.

-Ако Русија продолжи да не напаѓа или да дејствува против нас преку напади, како што е „SolarWind”, мешањето во нашите избори или спроведува агресија кон Навални, тогаш ние ќе одговориме, рече Блинкен, повикувајќи се на кибер нападите врз американски компании и улогата на притворениот критичар на Кремљ, Алексеј Навални.

Кина е „најкомплицирана” кога станува збор за односите, кажа американскиот државен секретар, но додаде дека САД нема да побараат ниту една нација да избере помеѓу двете земји.

-Сепак, вистина е дека ако делуваме заедно тогаш сме многу поефикасни во нашите односи со Кина – без разлика дали сме противник, ривал или партнер, додаде Блинкен.

Блинкен се наоѓа на еднонеделна турнеја, во чии рамки ги посети Берлин, Париз, Рим и Бари.