Барселона најде начин да го изигра финансискиот фер плеј
Барселона не се откажува од враќањето на Нејмар на „ Камп Ноу“ иако францускиот ПСЖ постојано ги одбива понудите. Последната понуда на Барселона беше од вчера, Осман Дембеле и Фелипе Кутињо плус 40 милиони евра во кеш, но ПСЖ ја одби понудата.
Францускиот тим бара 200 милиони евра во кеш и да добијат еден фудбалер по нивев избор, бидејќи не сакаат да го задржуваат незадоволниот Нејмар на „Паркот на Принцевите“.
Но, денеска, каталонскиот весник „Спорт“ објави дека челниците на шпанскиот шампион имаат подготвено нова понуда со која ќе го изиграат финансискиот фер плеј, а истовремено ќе ги задоволат барањата на ПСЖ. Барселона е подготвена да го прати Фелипе Кутињо во ПСЖ на позајмица и летово ќе плати 70 милиони евра за да дојде до Нејмар. Според договорот, доколку се согласи францускиот тим, тогаш Барселона во договорот ќе вметне клаузула за задолжителен откуп на договорот на Нејмар за дополнителни 130 милиони евра кои ќе ги плати во 2020 година.
Со овој потег, каталонскиот клуб ќе го изигра финансискиот фер плеј, бидејќи веќе потроши 120 милиони евра за трансферот на Антоан Гризман од Атлетико Мадрид, и нема да има потреба да подигнува кредит за ова лето да го реализира трансферот на Нејмар.