Евентуалното неусвојување на преговарачката рамка ќе доведе до одложување на отпочнувањето на пристапните преговори, оценува за Слободен печат, политичкиот аналитичар Петар Арсовски.

– Шансите за тоа да се случи се навистина мали. Бугарија веројатно инсистира на додатоци, но тие тешко дека би биле усвоени без да се изнајде консензус по прашањето. Од друга страна, самата рамка не верувам дека може да претрпи додатоци, вели Арсовски.

Коментирајќи ги пишувањата на „Политико“ за т.н. бугарски компромис кој бил усогласен во Брисел, а со кој би се признале македонскиот идентитет и јазик, но со бугарски основи, Арсовски вели дека во медиумите се појавиле голем број шпекулации.

Тој смета дека кај домашните власти е добро познато што би можело да е прифатливо, а што не, потсетувајќи на изјавата на премиерот Зоран Заев дека граѓаните треба да бидат подготвени и за неотпочнување на пристапните преговори, доколку се наметнав условувања за македонскиот идентитет и јазик.