Граѓаните што вчера ја кренале слушалката и одговориле на повиците од странски неидентификувани броеви, може да поднесат приговор до „Телеком“. Според извори на „Слободен печат“ од мобилните оператори, утврдено е дека се работи за таканаречена „Вангири – измама“, или измама со повици кон непозната дестинација.

„Упатуваме апел уште еднаш, до корисниците, и покрај безбедносните мерки што ги преземаме како компанија, да бидат внимателни и да не одговараат на пропуштени повици од непознати броеви, со цел во иднина повторно да не станат жртви на измама и да се избегнат нови евентуални злоупотреби и дополнителни непредвидени трошоци“ – велат од „Телеком“ за „Слободен печат“.

Измамата „Вангири“ своето име го добива од јапонскиот збор што преведен значи „заѕвони еднаш и спушти“. Измамата првпат се појавила во Јапонија, па оттаму потекнува и името. Поентата на измамниците е, да се јават на многу телефонски броеви, главно на мобилни апарати и да го остават бројот како „пропуштен повик“. По ова, ако корисникот се јави на пропуштениот број, тогаш повикот ќе му е наплатен по премиум „изгор-цена“.

Вчера граѓаните масовно беа нападнати со дојдовни повици од неидентификувани броеви од странство. На социјалните мрежи се шпекулираше дека тие доаѓаат од Литванија и Естонија. Броевите започнуваа на +370 (668), +370 (669), +48 780, +881 но не се исклучува можноста да има и други.