Адеми и Ристовски со Динамо Загреб го освоија Суперкупот на Хрватска
Динамо Загреб за кој играат македонските репрезентативци Аријан Адеми и Стефан Ристовски на „Максимир“ по подоброто изведување на пеналите го совлада Хајдук Сплит.
Вечерва „модрите“ го освоија рекордниот седми трофеј во хрватскиот Суперкуп.
Регуларниот дел од натпреварот заврши без голови, а победникот беше решен по ударите од белата точка.
Таму домаќинот беше поуспешен со 4:1 со головите на Петковиќ, Оршиќ, Љубичиќ и Иванушец. За Хајдук погоди само Ливај, а трагичари беа Млакар и Вуковиќ.
За Динамо стартер беше Адеми кој играше до 78 минута, а Ристовски иако беше на клупата за резерви не доби шанса да настапи.
Динамо најверојатно ќе биде противникот на нашиот шампион Шкупи во второто квалификациско коло на ЛШ доколку чаирчани во вторник ги одбранат скопските 3:0 во Гибралтар против Линколн Ред Импс.