Лионел Меси имаше интервју за „Мундо Депортиво“ оваа недела, разговарајќи за проблемите во фудбалскиот клуб на Барселона.

Најголем проблем направи спортскиот директор Ерик Абидал кога јавно ги обвини играчите дека се одговорни за заминувањето на претходниот тренер Ернесто Валверде.

Аргентинецот му одговори жестоко на спортскиот директор, велејќи му дека мора да ја прифати својата одговорност во ситуацијата и да ги каже имињата на играчите кои учествувале во смената на тренерот или да престане лажно да ги обвинува.

– Во клубот постоеше проблем во комуникацијата. Односот помеѓу тренерот и тимот беше секогаш добар, но имаше некои работи што јас, како поранешен фудбалер, можев да ги чувствувам. Му кажав на клубот што мислам за тоа и ја донесовме одлуката да го разрешиме Валверде – рече Абидал за „Диарио Спорт“, а потоа додаде:

– Научив една важна работа – проблемите во тимот да се решат во соблекувалната, а не во медиумите.

Французинот Абидал своевремено (како одбранбен играч) имаше 125 натпревари за каталонската екипа со која успеа двапати да ја освои Лигата на шампионите.