„Мета“ се закани дека ќе ги отстрани медиумските содржини од Фејсбук
Компанијата „Мета“ на Марк Закерберг се закани дека ќе ги отстрани вестите од Фејсбук во САД, противејќи се на новиот закон кој треба да им даде поголема моќ на новинските организации да преговараат за надоместоците за содржината што се споделува на оваа социјална мрежа, пренесува Би-Би-Си.
Сенаторката од Минесота, Ејми Клобучар, го воведе Законот за конкуренција и заштита на новинарите (JCPA) во Конгресот, обезбедувајќи поддршка и од демократите и од републиканците.
Законот ќе им обезбеди на медиумите посилна позиција во колективните преговори со социјалните медиуми за поголем дел од приходите од рекламирање, пренесува Би-Би-Си.
Медиумските компании тврдат дека написите споделени на платформата на Мета ѝ носат огромни приходи. Мета, пак, одговара дека нејзината платформа всушност им носи поголем читаност на весниците кои се во неволја, нагласувајќи дека објавуваат содржина на Фејсбук затоа што „имаат корист од тоа“.
„Ако Конгресот усвои закон за несовесно новинарство како дел од нацрт-законот за национална безбедност, ќе бидеме принудени да размислиме за целосно отстранување на вестите од нашата платформа“, рече портпаролот на Мета, Енди Стоун.
Австралија донесе сличен закон во март 2021 година и Мета накратко го суспендираше објавувањето на вести на Фејсбук. Таа ја повлече одлуката по бранот критики и постигна договор со австралиската влада.
Поддржувачите на законот во САД предупредуваат дека доколку не помине во Конгресот, социјалните мрежи „де факто ќе станат локални весници“.
Мета ги „голта“ медиумските куќи, тврди директорот за истражување на американскиот проект за економски слободи Мет Столер, а неговите „обиди да го уценува Конгресот повторно покажуваат зошто овој монопол е закана за демократиите ширум светот“, додаде тој.