Научниците од медицинското училиште при Универзитетот „Јагелонијан“ во Краков објасниле дека женското тело е почувствително во втората фаза од менструалниот циклус, па затоа тие во тој период се особено чувствителни на мирисите.

Жените во оваа фаза се повеќе подложни на инфекции, па нивното тело се обидува да ги избегне работите што би можеле да бидат штетни – објасниле научниците и додале дека повеќето испитаници во истражувањето потврдиле дека разните мириси им биле поодбивни од вообичаеното.

Истражувањето опфатило жени на возраст од 18 до 45 години. Во рамките на студијата, жените биле замолени да замислат седум различни одвратни сценарија и да го оценат нивото на одбивност откако погледнале 20 фотографии.

Истата работа ја правеле додека биле во фоликуларната фаза (петти или шести ден од циклусот), а потоа повторно во лутеалната фаза (петти ден по позитивниот тест за овулација или на 20-ти ден од циклусот, ако резултатот од тестот за овулација не бил позитивен).

Во текот на втората половина од циклусот (лутеалната фаза), кога прогестеронот ја потиснува имунолошката функција, на жените повеќе им биле одбивни оние работи како што се преполни возови, седење покрај некој со отворени рани или непријатни миризби на телото.

Истражувачите заклучиле дека на жените во тој период, всушност, им се гади од помислата на бактериите. Своето откритие го објавија во списанието „Еволуција и човечко однесување“, пренесува Метро.