Жорди Алба пристигнува во Интер Мајами, можеби и Луис Суарез
Шпанскиот фудбалер Жорди Алба ќе им се придружи на поранешните соиграчи од Барселона Лионел Меси и Серхио Бускетс во Интер Мајами, соопшти денеска сопственикот на тој МЛС клуб.
Алба, 34-годишниот поранешен репрезентативец на Шпанија е без клуб откако неговиот договор со Барселона истече на крајот од минатата сезона.
Алба играше за Барселона од 2012 година и има освоено 18 трофеи со клубот, вклучувајќи шест титули во Ла Лига и Лигата на шампионите во 2015 година.
Доаѓањето на поранешните играчи на Барселона би можело да продолжи. Како што пренесуваат медиумите, Интер е во преговори со поранешниот напаѓач на „блауграна“ Луис Суарез, кој моментално настапува за бразилски Гремио.
Наводно, клубот и играчот биле во контакт подолго време и преговорите напреднале, но Гремио прави проблем поради висината на отштетата што ја бара за Уругваецот.
Според „ЕСПН“, Суарез е подготвен да врати вкупно 10 милиони долари од својата заработка за да оди во Интер, но Гремио сака гаранции дека Уругваецот нема да игра за ниту еден друг клуб во 2023 година.
Суарез има важечки договор со бразилскиот клуб до крајот на следната година.