Состојбата на патната инфраструктура е клучна за економскиот развој, конкурентноста на економијата, привлекувањето инвестиции… Старите патишта треба да се обновуваат, а новите да се градат според најновите стандарди, на база на стручни научни анализи и со примена на најновите технологии, но рамномерно за да се развиваат сите делови од државата. Инвестиции ѝ се потребни и на науката за да може да понуди кадар што ќе одговори на предизвиците од новата технологија и модернизацијата.

Тоа се дел од пораките од дводневниот Прв македонски конгрес за патишта што почна вчера во Скопје со учесници од 15 држави и со презентација на 70 научни труда на најразлични теми.

– Повеќе години се наоѓаме во голем инвестициски циклус, со што не само што се комплетира финалниот изглед на патната карта, туку се стекнуваат нови знаења и искуства во примена на нови технологии и материјали, се следат и современите тенденции во безбедноста на патиштата, а секако и се учи на неизбежните грешки при изградбата од минатото – рече  директорот на Јавното претпријатие за државни патишта, Зоран Китанов.

Според ректорот на УКИМ, Никола Јанкуловски, особено внимание треба да се посвети на инженерскиот кадар.

– Надлежните институции треба да продолжат да инвестираат и во научно-стручниот кадар, кој во иднина ќе може да произведе кадри што ќе ги реализираат сите значајни инженерски предизвици. Развојот на науката, технологијата на изведба, како и новите материјали бараат постојана едукација и усовршување на инженерскиот кадар – наведе Јанкуловски.

Претседателот на Друштвото за патишта Горан Милевски забележа дека во следниот период една од главните задачи ќе биде и односот кон веќе изградените патишта за нивно одржување и експлоатација.

Дел од предизвиците, како што рече, е и староста на лабораторијата на Градежниот факултет која потекнува од 80-тите години на минатиот век и не може да одговори на сите денешни предизвици и барања не само на постојниот инвестициски циклус, туку и на современите тенденции на високото образование.

Тековната инвестициска програма за изградба и обнова на целата патна мрежа изнесува над милијарда евра. Досега, како што информираше министерот за транспорт Горан Сугарески, се завршени активности на 750 километри во вредност од половина милијарда евра, а се работи на изградба и обнова на 400 километри.