Повеќе од 120 милиони дози вакцини против Ковид-19 се дадени во Турција од почетокот на имунизацијата во јануари, покажуваат официјалните податоци од здравствените власти, пренесува Анадолија.

Повеќе од 56,18 милиони луѓе ја примиле првата доза од вакцината, додека повеќе од 50,32 милиони се целосно вакцинирани, соопшти турското Министерство за здравство. Трета, дополнителна доза, примиле повеќе од 12,1 милиони луѓе.

Турскиот министер за здравство Фахретин Коџа на Твитер објави дека во Турција не е евидентиран ниту еден случај на варијантата омикрон, неодамна откриена во Јужна Африка, додавајќи дека во оваа земја доминантна е делта варијантата.

Според Универзитетот Џон Хопкинс, од декември 2019 година, пандемијата на коронавирус однела околу 5,19 милиони животи во најмалку 192 земји и региони, а повеќе од 260,87 милиони случаи се регистрирани ширум светот.