На малата сцена во Македонскиот народен театар во тек се читачките проби за претставата „Лагата“, работена по текст на современиот и актуелен француски писател, драматург, театарски режисер, сценарист и филмски режисер, Флоријан Зелер.

Претставата „Лагата“ е во режија на Бесфорт Идризи, а станува збор за безмилосна комедија која го анализира лицемерието во општеството. Дејството се врти во лавиринт на лаги, измами и непријатни вистини што се случуваат во бракот.

Брачниот пар Мишел и Лоранс доаѓаат на вечера, но Алис истото попладне го забележува Мишел како се бакнува со друга жена, притоа е во дилема дали да ѝ каже на пријателката што видела или не. Нејзиниот сопруг Пол верува дека е подобро да се однесуваат како ништо да не се случило. Алис е далеку од сигурна. Со оглед на тоа што нивната сопствена врска се држи под лупа, станува јасно дека некои вистини најдобро е да не се кажат… а границата меѓу вистината и лагата може да биде опасна за преминување.

Во претставата играат Јордан Симонов, Габриела Петрушевска, Оливер Митковски и Драгана Левенска. Сценографијата ја работи Крсте Џидров-Џиби, костимите ќе бидат дизајн на Роза Трајческа-Ристовска, а авторската музика во оваа театарска претстава ја потпишува Игор Василевски-Новоградска. Премиерата се очекува кон втората половина на мај годинава.

(Текстот е објавен во „Културен печат“ број 125, во печатеното издание на весникот „Слободен печат“ на 16-17 април 2022)