Службата за општи и заеднички работи на Владата на Република Северна Македонија на 17.06.2019 распиша тендер за одржување и уредување на зелени површини во Владата, резиденцијалните објекти и органите на државната управа,

Според објавата на Електронскиот систем за Јавни набавки склучен е договор со друштвото за производство, трговија и услуги „Триста-груп“ ДООЕЛ Скопје, компанија која единствена поднела понуда за овој тендер.

Во објавата стои дека вредноста на склучениот договор со вклучен ДДВ е 48.158.254 денари или околу 783.000 евра.

Инаку, за потсетување пред точно една година Владата распиша тендер за купување цвеќиња во вредност од 670 илјади евра за хортикултурно одржување и уредување на објектите на државната управа.

Во тогашниот оглас на Службата за општи и заеднички работи, објавен на Бирото за јавни набавки, Владата бараше целосно одржување на садниците и обновување, технички кадар, минимални типови на опрема, материјални средства на одржување.

Тогашните услови за кандидатите што ќе се пријават на огласот е да имаат минимум 7 милиони денари вкупни приходи во последните три години (2015, 2016 и 2017 година), а како главен критериум за доделување на договорот беше најниската цена.