ВИДЕО: Шериф го изненади Динамо, Ристовски и Адеми со тешка задача на „Максимир“
Започнаа возбудувањата во плеј-офот како последна пречка на патот кон групите во Лигата на шампионите, Динамо Загреб беше убедливо поразен на гостувањето кај Шериф Тираспол (3:0).
Молдавскиот претставник има голема шанса да влезе во групите на ЛШ, денеска со двата гола на Траоре и еден на Коловос стигна до високата победа над „модрите“.
Во составот на хрватскиот шампион како што и беше најавено не се најде македонскиот репрезентативец Аријан Адеми кој и натаму не е доволно опоравен од повредата, а Стефан Ристовски го одигра целиот меч во Молдавија. Реваншот на „Максимир“ во Загреб ќе се игра на 25 август.
Исто така блиску до групите на најголемото европско клупско натпреварување е и украинскиот Шахтјор Доњецк кој славеше кај Монако во Франција со 0:1. Стрелец на единствениот гол беше Педрињо во 19 минута од мечот на стадионот „Луј Втори“.
Салцбург ќе патува со предност во Данска, откако со 2:1 го совлада Брондби. Иако Данците поведоа уште во четвртата минута со голот на Уре, Австријците направија целосен пресврт во второто полувреме благодарение на Адејеми и Аронсон.