ВИДЕО | Медицинско чудо: Жена од Уганда на 70 години роди близнаци
Сафина Намукваја од Уганда, на 70 години стана најстарата жена во Африка која се породила. Локалната болница објави дека по третманот со ин-витро, таа родила здрави близнаци, пишува „Би-би-си“.
„Прославувајќи ја нашата 20-годишнина, го постигнавме извонредното – родивме близнаци на најстарата мајка во Африка на возраст од 70 години!“, соопштија од болницата.
Како што пренесуваат медиумите, жената се породила со момче и девојче со царски рез, во центарот за плодност во главниот град Кампала. Близнаците тежеле по 2 килограми, а се породила во 34-та недела.
„Оваа приказна не е само за медицински успех; се работи за силата и издржливоста на човечкиот дух“, додаваат од болницата.
Сафина за медиумите во Уганда изјави дека ова е нејзино второ породување за три години, по раѓањето на својата ќерка во 2020 година.
Таа го опиша раѓањето како „чудо“ и се присети на тешкотиите за време на бременоста. Сафина раскажа дека таткото на децата ја напуштил непосредно пред нивното раѓање.
Тврди дека мажите се плашат да станат татковци на близнаци и дека нејзиниот сопруг никогаш не се појавил во болницата каде што била примена.
Инаку, Сафина живее во селото Масака, околу 120 километри западно од главниот град. Таа немала деца со нејзиниот прв сопруг, кој починал во 1992 година, и поради тоа била етикетирана како „проколната“. Вториот сопруг го запознала во 1996 година.
Не е објавено дали бременоста е постигната преку донирана јајце клетка или Сафина ги замрзнала сопствените јајце клетки додека била во репродуктивна возраст.