Во услови кога голем дел од Скопје, особено повисоките зони во градот немаат вода, а од ЈП „Водовод и канализација“ постојано апелираат до граѓаните рационално да ја трошат и да не ја користат за наводнување, низ градот има примери дека дел од водата што е во надлежност на претпријатието или на општините неконтролирано се троши.

Граѓаните постојано се жалат дека повеќето од јавните чешмички не се функционални и на жештините немаат каде да се напијат вода или да се разладат. Но, не значи и дека сите чешмички што работат им служат на скопјани. Напротив, онаа поставена на кејот на Вардар веднаш до градскиот плоштад, наместо да тече – буквално прелева на сите страни. И додека околу неа е направен базен од пивка вода што неконтролирано тече, ниеден минувач не може да се напие вода од високиот и силен млаз што прска од чешмичката.

Поради тоа, овој пат граѓаните  апелираат до „Водовод и канализација“ да се погрижат за рационално трошење на водата за пиење и што поитно да ја поправат чешмичката за да можат да ја користат минувачите.