ВИДЕО | Анализа: Ако сите земји членки ја усвојат преговарачката рамка каква што е, Албанија ќе почне со преговори, а ние ќе треба да лобираме да го заштитиме нашиот идентитет

Утрински брифинг

Вчера беше еден многу разочарувачки ден и за ЕУ и за сите кои веруваат во европските процеси. Лидерите на ЕУ ненадејно ја откажаа прес конференцијата откако претходно два часа доцнеа, што значи дека жестоки биле разговорите меѓу лидерите на ЕУ. Не е само Македонија разговачара, разочарана е и Албанија, но и лидерите од другите балкански земји кои чекаа да се фотографираат со добри вести, вели за Утрински брифинг Тања Милевска, дописничката на МИА од Брисел. 

-Сега за сега единствена реакција што ја имаме е бугарската, изјавата на Петков дека тоа не се барања на Бугарија туку на ЕУ. Петков не може да тврди дека тоа е став на Унијата, тоа треба да го каже Унијата. Макрон останува оптимист, па можеби во салата се кажало нешто, вели Милевска.

Еди Рама вчера рече дека во салата Бугарија останала осамена во нивните барања, но очигледно дека ЕУ нема сила да се противстави на тоа. А во меѓувреме Бугарија достави уште пет барања до Македонија.

-Досега француските дипломати брифираа дека е тешка ситуацијата во Бугарија, а вчера првпат се спомена дека е тешка политичката ситуација и во Македонија што е добро Унијата да го има предвид, вели Милевска.

Вчера за првпат прес салата беше преполна со новинари на прес конференцијата на балканските лидери. Тоа би значело дека повторно сме под зголемен интерес на медиумите.

-Албанија, Македонија и Србија за првпат успеаја да издејствуваат прес конференција во Комисијата. Проширувањето ќе рединамизира поради Молдавија и Украина и за тоа треба да бидеме свесни, вели Милевска од Брисел.

Вчерашниот ден заврши со веќе познатите резултати. Сега е прашање што понатаму и како ќе се одвива постапката.

Драган Тилев, државен советник за европски политики од СЕП
Драган Тилев, државен советник за европски политики од СЕП

-Постапката ќе трае, за тоа нема дилеми. андидатскиот статус на Украина е добар чекор на ЕУ кој и за нас е важен и покажува дека ЕУ кога сака и мора може. Ако вие не го заземете геополитичкиот простор тој ќе го заземе некој друг, тоа е правило. Малите земји се предмет на одлуките на големите земји, а ние можеме да покажеме спремност за дијалог оти емоциите и фрустрациите се за дома, а кога ќе дојдете на работа треба да се вложите да ги имплментирате целите на државата, вели за Утрински брифинг, Драган Тилев, државен советник за европски политики од СЕП.

Сето она што сега се случува не може да се подведе под еден заеднички именител оти секој се обидува да ги наметне своите интереси, вели Тилев и додава дека во однос на францускиот предлог како претседавач на Унијата сега треба да се произнесат сите драви од ЕУ.

-Она што Бугарија се обидува е да ги внесе своите барања во преговарачката рамка. Сега е последен момент кога земја членка може да ги внесе своите барања во официјален документ на Унијата, во таа т.н. преговарачка рамка. Ова се случува првпат во момент кога преговарачката рамка треба да се усвои, земјата кандидат на јавна сцена да рече дека не се согласува со делови од преговарачката рамка кои се однесуваат на нашите идентитетски прашшања, вели Тилев за Утрински брифинг.

Има две димензии. И покрај падот на владата на Петков и по она што вчера се случуваше во Брисел, во бугарското собрание продолжија да дискутираат за францускиот предлог. Тој денеска ќе биде на седница, појаснува Тилев и додава дека вчера конечно на собраниска комисија се обезбеди мнозинство.

-Во текот на викендот, додека нашиот тим е сѐ уште таму, дијалогот ќе тече. Ние уште неколку дена сме под француско претседателство на Унијата, вели Тилев.

Следниот претседавач, Чешка, веројатно очекуваше дека Франција ќе го реши проблемот, па тој не се наоѓа во нивната дипломатска агенда.

-Доколку Бугарија ја усвои преговарачката рамка, потоа Корепер со Борел ќе се обидат да направат прифатлив документ со другите членки кои сакаат да најдат солуции. Текстот има обременетост со историски и идентитетски прашања што досега не било. Но, ова не значи дека решение не може да се најде. Според мене, ако се ослободиле од фрустрациите и емоциите треба да ги бараме патиштата за продолжување на евроинтеграцијата, вели Тилев.

Тилев додава дека е логично чешкото претседателство да се занимава со економија со оглед дека нѐ чека тешка зима, но ако проблемот не се реши Чешка несомнено ќе мора да се занимава и со тоа прашање.

-Додека 27 земји членки едногласно не се согласат околу преговарачката рамка таа не е дефинирана, вели Тилев. -Теоретски е можно доколку која било земја членка има приговор на предлогот на преговарачката рамка таа ќе биде блокирана. Преговарачката рамка е начелен документ, битна е содржината. Но, делови од нејзината содржина не се прифатливи за нас, вели Тилев.

Ако никој не се побуни и сите се согласат тоа значи финализирање на процесот во фазата која е предуслов за почеток на преговори. Ако притоа ние останеме на својата позиција дека има делови кои се неприфатливи за нас, ќе мораме да бараме излез во продолжување на реформите од една страна, а од друга страна ќе мора да се продолжи со лобирање за промена на преговарачката рамка што е исклучително тешко, појаснува Тилев за Утрински брифинг.

Проследете го целиот разговор во видеото

Видео на денот