Сведокот Зоран Верушевски, поранешен директор на УБК, денеска не дојде во суд за да сведочи во предметот „Таргет – Тврдина“.

Во овој случај обвинети се поранешниот началник на Петтата управа во МВР Горан Грујевски и вработениот во УБК Никола Бошкоски, кои имаат политички азил во Грција, поранешната министерка за внатрешни работи Гордана Јанкулоска и поранешниот директор на УБК, Сашо Мијалков, како и поранешниот шеф на неговиот кабинет, Тони Јакимовски.

– Судот му доставил покана и на неговото работно место, Советник за национална безбедност на премиерот на Македонија, но судот нема повратна информација дали ја примил поканата – изјави судијката Џенета Бегтовиќ, која следното рочиште го закажа за 23 септември.

Истрагата за предметот „Тврдина“ беше отворена на 29 март 2016 година, а за предметот „Таргет“ на 17 ноември 2016 година, а поради нивната поврзаност се споени во еден предмет. Обвинението е подигнато на 30 јуни 2017 година.

Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.

Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви.