Градоначалникот на општина Карпош Стефчо Јакимовски доби извинување од Управата за водење на матични книги, за инцидентот во кој на неговиот син и снаа наместо извод од матичната книга на венчаните, им издале извод од матичната книга на умрените.

Од Управата се извинија до семејството на Јакимовски за, како што се наведува, немилиот настан, со објаснување дека се работи за несакана грешка на издаден погрешен образец. Оттаму уверуваат дека административниот службеник кој што го направил пропустот, ќе биде санкциониран во краток рок.

Од Управата велат дека бил направен увид и утврден е пропуст.

„Административниот службеник, вработен во Управата за водење на матични книги – Подрачно одделение Скопје во краток рок ќе биде санкциониран согласно Законот за административни службеници. Јавно се извинуваме на семејството на градоначалникот на Општина Карпош г-дин Стевчо Јакимовски за немилиот настан“, велат од Управата.

Јакимовски претходно денес ја опиша ситуацијата како црн хумор, коментирајќи дека денот на нивната венчавка е впишан како ден на смртта, а младите луѓе се во шок.