Тројца мртви и илјадници домови уништени во силен земјотрес на Папуа Нова Гвинеја
Земјотрес со јачина од 6,9 степени според Рихтеровата скала го погоди оддалечениот дел на западна Папуа Нова Гвинеја при што загинаа најмалку три лица и предизвика голема штета на околу илјада домови, соопштија официјални лица, пренесува АП.
Земјотресот го потресе регионот Источен Сепик околу 6.20 часот во неделата во близина на градот Амбунти, на околу 756 километри северозападно од главниот град Порт Морзби, и на длабочина од околу 40 километри, според извештаите на Австралиската радиодифузна корпорација.
Гувернерот на провинцијата Источен Сепик, Алан Бирд објави на Фејсбук во неделата дека првичните проценки покажуваат дека земјотресот уништил околу илјада домови во областа која веќе „се справуваше со широко распространетите поплави“ од почетокот на март.
„Поплавите всушност зафаќаат област долга повеќе од 800 километри, и затоа има околу 60 или 70 села вклучени низ целата река Сепик“, изјави Бирд за Еј-Би-Си во понеделникот.
Локалните екипи за итни случаи веќе беа активни во регионот поради поплавите кога се случи земјотресот.
„Поплавите не беа нивниот најголем проблем. Тие самоуверено се справуваа со тоа бидејќи тоа е нешто на што се навикнати“, рече Бирд. „Тоа беше земјотресот за кој никој не беше подготвен. Тоа би предизвикало најзначајна штета сега“.
Папуа Нова Гвинеја, јужнопацифичка островска држава лоцирана на север од Австралија, беше погодена со два земјотреси во април минатата година, вклучително и земјотрес со јачина од 7 степени според Рихтеровата скала во кој загинаа четири лица во оддалечен северен дел на земјата.