Шпанскиот тренер Тони Надал изјави дека 19-годишниот Карлос Алкараз има најголеми шанси да ја замени „големата тројка“ која ја сочинуваат Рожер Федерер, Рафаел Надал и Новак Ѓоковиќ, пренесуваат шпанските медиуми.

Пред пет дена Алкараз за првпат во кариерата освои титула на Грен слем турнирите, откако во неделата триумфираше на „УС Опен“.

Младиот шпански тенисер од понеделник и официјално е број еден на АТП листата.

– За две недели Карлос постигна нешто за што многу одлични тенисери сонуваат во текот на нивните кариери. Зрелоста со која успеа да го оствари ова е тешко да се надмине. Ми кажаа за него кога имаше 12, 13 години. Првпат го гледав кога имаше 14, 15 години. Тогаш ме импресионираше. Алкараз покажа дека е тенисерот кој има најмногу шанси да ја замени „големата тројка – рече Тони Надал.

Тони Надал беше тренер на Рафаел Надал од 1990 до 2017 година. Тој во моментов е тренер на канадскиот тенисер Феликс Оже-Алијасим.