Струга Трим Лум во Подгорица брка трето квалификациско коло во Конференциската лига
Актуелниот македонски фудбалски шампион Струга Трим Лум денеска напладне замина за Подгорица каде во вторник (1 јули) од 21.00 часот ќе го игра реваншот против Будуќност во второто квалификациско коло од Конференциската лига.
Поаѓањето беше од Струга, а „црвено-белата“ експедиција во црногорскиот град се очекува да пристигне во вечерните часови.
Во понеделник навечер, точно во 21.00 часот, играчите на Шпетим Дуро ќе го имаат единствениот официјален тренинг на стадионот во Подгорица, додека во 20.30 часот тренерот ќе се појави пред новинарите на прес конференција да ги сподели очекувањата за возвратниот дуел.
Потсетување дека на првиот меч одигран на стадионот „Билјанини извори“ во Охрид нашиот претставник триумфираше со 1:0.
Победникот од овој двомеч во третото квалификациско коло ќе игра со подобриот од пресметката меѓу велшкиот ТНС и Есперанж од Луксембург. Во првите 90 минути во Велс ТНС и Есперанж ремизираа со резултат 1:1. Возвратната пресметка ќе се игра исто така во вторник од 20.00 часот.