НАТО и Европската унија (ЕУ) се радуваат на идната соработка со новоизбраниот претседател Џо Бајден за зајакнување на врските со САД, нагласи синоќа генералниот секретар на Алијансата, Јенс Столтенберг.

– Со нетрпение очекуваме да работиме со новоизбраниот претседател Џо Бајден за зајакнување на американско-европските врски во време кога се соочуваме со глобални предизвици на кои никој од нас не може да се справи самостојно, наведе генералниот секретар на НАТО, Јенс Столтенберг на својот профил на Твитер по работната вечера со претседателот на Европскиот совет, Шарл Мишел, ден пред инаугурацијата на американскиот претседател.

Столтенберг го покани Бајден да учествува на самитот на НАТО, за кој сè уште не е одреден датум. Мишел му предложи и на американскиот претседател да организира посебна средба за него со сите лидери на ЕУ.