Стивен Џерард ќе му биде тренер на Дарко Велковски во Саудиска Арабија
Како што и се најавуваше во изминатиот период, тоа денеска доби потврда, нов тренер на Ал-Етифак е славниот англиски фудбалер Стивен Џерард.
Во редовите на Ал-Етифак од Саудиска Арабија настапува македонскиот репрезентативец Дарко Велковски (28) кој минатата сезона запиша 15 настапи.
Ова е прва тренерска работа за 43-годишниот Џерард откако беше отпуштен од премиерлигашот Астон Вила минатиот октомври по серијата од само две победи од 12 натпревари.
Англичанецот се надева дека ќе има успешни резултати со Ал-Етифак кој заврши на седмото место лани во лигата на Саудиска Арабија со 10 победи од 30 натпревари.
Ал-Етифак двапати беше шампион на таа земја, последен пат ја вкуси титулата во сезоната 1986/87.
Џерард го водеше и Ренџерс помеѓу 2018 и 2021 година, водејќи го тимот од Глазгов до титулата во шкотската Премиерлига во сезоната 2020/21.