Сопственикот на Рагуза Перица Голомеиќ денеска во името на сопствениците на ресторани за свадби повторно побара да се овозможи работа на рестораните. Пред една недела тие доставија и протокол за работа, но се уште нема никаков одговор.

– Протоколот е ист по кој работат сите останати ресторани и кафе барови. Сметаме дека Комисијата за заразни болести треба да донесе издржан здравствен протокол за нашата дејност, а надлежните институции ќе се погрижат истиот да се спроведе во пракса. Надлежните треба да ги и тересира здравствениот аспект и воопшто не е важно дали гостите се случајно дојдени во ресторанот или некој ги поканил на организиран настан. Свесни сме за епидемиолошката состојба во моментов и затоа не бараме во прва фаза да правиме традиционална свадба, туку свечен ручек согласно постоечките протоколи, рече Голомеиќ.

Прашан дали смета дека е претерано нивното барање сега кога повторно во земјава се воведува полициски час, тој одговори дека не бараат нешто што веќе го нема.

– Ние знаеме за примери дека и сега се организираат прослави во а ла кард рестораните. Зошто да не се организираат и во рестораните за свадби, нагласи Голомеиќ.