СЛОБОДЕН УДАР: Еколошки освестени додека не ни се „чепне“ нашето

И така, додека еколошката свест ни се билда по социјалните мрежи, „гласни“ зад тастатурата, вистината е дека малкумина својата удобност и покомфорен живот би го замениле со зеленило, па дури и чист воздух. Има ли воопшто такви?

Последната презентација на Деталниот урбанистички план во Општина Центар, кој го опфаќа просторот на дел од Градски парк и дел од Дебар Маало, уште еднаш покажа многу ниско ниво на еколошка свест кај луѓето. Поточно, секој од нас е еколошки свесен кога тоа не му одзема дел од нешто што си е негово.

Граѓаните засегнати од овој план му порачаа на градоначалникот на Центар дека не сакаат зеленило и паркови, туку сакаат згради и станови за да си ги обезбедат своите деца. Од јасно – појасно! И тоа само затоа што градежните парцели на кои може да се градат згради се намалуваат за 30 отсто, дел кој треба да биде наменет за зеленило. Значи, зацртаните станбени објекти во планот остануваат, со иста висина и катност, но станбената површина се намалува, а со тоа и квадратите што ги добиваат сопствениците од инвеститорот во замена за парцелата. А кој дозволува да му се гризне од колачот?

Прочитајте и...  Пренаменет буџетот за субвенции: Пари имало само за инвертери и за печки на пелети

Ги разбирам луѓето. Секој сака материјално да си ги обезбеди своите деца, особено во вакво време кога за повеќето граѓани купувањето нов стан е невозможна мисија. Тие дури порачаа – што ќе ни е зеленило, тука ни е Градскиот парк!

Слично беше и со заложбите на паркингот кај „Холидеј ин“ – наместо згради да се прави парк. Притоа, никој не помисли на жителите на старото Ново Маало, кои живеат во, благо кажано, нехумани услови, во куќи стари и по 80 години. Нивната надеж е во усвојување на ДУП за овој простор и во инвеститорите кои ќе им овозможат пристојно животно катче. Не верувам дека многу се загрижени за зеленилото околу нив, кога си имаат мака со секојдневната егзистенција.

Во меѓувреме, граѓаните здружени на Фејсбук по групите за заштита на животната средина, воздух, здравје и слично, се претворија во „чуденки“. Летаат жестоки коментари и обвинувања до скопјани што не се откажуваат од својот имот во корист на зеленилото. Зборуваат за повисоки цели, бараат надлежните да најдат решение за аерозагадувањето. И, што е право – се гушиме, ќе „испоцркаме“, а долгорочно решение нема!

Прочитајте и...  Дали Заев се сопна?

На сила се мерките на Владата. Шилегов ги пушти автобусите да возат бесплатно. Цената на паркирањето беше двојно поголема. Но ниту во автобусите се качи човек повеќе од вообичаеното, ниту по улиците се намали бројот на автомобилите. Никој не се откажува од комоцијата. Среќни беа само оние што вчера заштедија пари за билет. Ни загадувањето не се намали, освен што Градот ќе мора да им плати на превозниците за бесплатната услуга. Се разбира, од наши пари.

Во Пекинг, градот што важи за еден од најзагадените во светот, е тестирана кула за прочистување на воздухот, која ги вшмукува штетните ПМ-честички, а испушта чист воздух. Наводно поради нејзината активност воздухот во околината бил за 55 отсто почист од вообичаеното.

Прочитајте и...  Поради загадениот воздух во Тетово, Куманово и Кавадарци стапуваат на сила мерки

Кога кај нас надлежните би се решиле да изградат ваква кула, би настанал проблем. Каде да се гради? Во зеленило никако! – жестоко би реагирале повеќето граѓани. На градежна парцела нема шанса, а станови за децата? – би протестирале другите.

А градоначалниците, нели, треба да ги штитат интересите на сите граѓани. Оди па реши…

И така, додека еколошката свест ни се билда по социјалните мрежи, „гласни“ зад тастатурата, вистината е дека малкумина својата удобност и покомфорен живот би го замениле со зеленило, па дури и чист воздух. Има ли воопшто такви?

Во меѓувреме, преживуваме во Скопје, ги обвинуваме градоначалниците, премиерот, државата, дека ни го узурпираат правото на чист воздух и не ни даваат шанса за здрав живот. Дека не нудат решение, само мерки. И тоа е вистина. Но, не е лошо секој од нас да се погледне и себеси и своите постапки. Можеби уште постои чувството на срам. Или не, којзнае.

Поврзани вести

Ердогановите ултранационалистички пријатели предизвикуваат тензии во владејачката партија

Лора Пител/Financial Times

17 пациенти починаа во скопските болници, најмладиот има 31 година

Михаило Донев

Семејното насилство во Грција: Насилниците ретко одат во затвор

Слободен печат

Дали Заев се сопна?

Мирољубивото „распуштање“ на Дејтонскиот мировен договор е цинична заблуда

Д-р Емир Суљагиќ

ФОТО+ВИДЕО: Насилни протести ширум Франција против законот за „општа безбедност”

МИА

1 comment

Boban 29/01/2020 - 09:42 at 09:42

Од текстов испаѓа да не праиме ништо, политичарите исто да не праат ништо да не навредат некој.
Пред избори може да лажат, ќе се стопирале изградби ќе се преземале мерки дрн дрн, видовме во Аеродром колку згради никнаа и тоа што беше малку зеленило да се уништи (пример кај Мајчин дом).

Катастрофа невидена се 90 посто од нашиве политичари и градоначалници.

Reply

Остави Коментар

MacedonianAlbanian