Скандал во мак-баскетот: Родители и играчи тргнале да се пресметаат со судиите
Голем скандал се случи на натпревар од младинската М18 лига помеѓу екипите на Феникс 2010 и Вардар, кој не го дочека крајот бидејќи навивачи влетаа на теренот со цел да се пресметаат со судиите.
Неофицијално, напаѓачи биле родители на кошаркарите на Вардар, но и дел од самите кошаркари. Инцидентот се случил во последната четвртина кога дел од гостинските кошаркари револтирани од досудениот прекршок и техничка грешка на играч на Вардар, дел од навивачите влегле на теренот и се обиделе физички да се пресметаат со официјалните лица. Откако интервенирала полицијата, „воинствените“ родители-навивачи се вратиле на трибините и се обиделе да го прекинат снимањето на мечот и да му ја земат камерата на официјалниот снимател.
Натпреварот веднаш бил прекинат и е регистриран со службени 20:0 за Феникс, а Вардар нема да добие бод за поразот.
Комесарот Сречко Хорват им изрече драконски казни на кошаркарите но и на клубот Вардар. Поради големиот број технички и исклучувачки грешки, како и пријавите за нивните играчи по мечот ќе треба да плати вкупно 125.600 денари. Три кошаркари на овој тим, Мухамед Тачи, Павел Атанасов и Марин Петков се суспендирани на по пет натпревари и тоа за исклучување, обид за напад на судиите и за пријава по мечот.
Суспензија од по два натпревари добија и двајцата судии на оваа средба, Петровиќ и Филиповски.