Демократската унија за интеграција денеска продолжува со седницата на Централното претседателство која беше почната минатата сабота. 

Пред почетокот на седницата, при пристигнувањето во партиското седиште во тетовска Мала Речица, портпаролот Бујар Османи повтори дека денеска ќе има можност за внатрепартиската дебата за прашања околу партиското работење што во јавноста ги наметнаа одредени членови кои се дел од таканаречената „Огнена група“. 

– Ќе се разговараа за сите прашања кои останаа неразговарани на претходната седница кои што ќе бидат отворени и покренати од страна на членовите на претседателството. Секое прашање кое што ќе биде покренато од членовите на претседателството ќе може да се разговара – истакна Бујар Османи.

На прашањето на новинарите дали Муса Џафери вчера е разрешен од функцијата прв човек на Надзорниот совет, Османи рече дека денеска ќе се разговара за сите прашања.