Сараево денеска се најде на второто место на листата на градови со најмногу загаден воздух во светот, откако од почетокот на неделата се гуши во магла, а концентрацијата на опасните честички во воздухот беше 44 пати поголема од дозволената според стандардите на Светската здравствена организација (СЗО).

Според податоците на швајцарската веб-страница АКјуЕр, која собира податоци за загаденоста на воздухот од повеќе од десет илјади мерни станици ширум светот, најзагаден град во утринските часови е индискиот Њу Делхи со индекс на загаденост 287, додека Сараево е означен со индекс 270.

Главните градови на Индија и на Босна и Херцеговина, заедно со Дака во Бангладеш, беа означени како „многу нездрави“.

Во Сараево, концентрацијата на ситни честички прашина означени со ПМ 2,5 беше означена како „опасна“ бидејќи беше 44 пати повисока од вредностите што ги толерираа стандардите на Светската здравствена организација (СЗО).

Причините за нездравиот квалитет на воздухот во Сараево се секогаш исти. Во период на стабилни временски услови без ветер, во зимски услови над градот поради температурна инверзија, се создава магла која ја спречува циркулацијата на воздухот и исфрлањето на штетните материи.

Истовремено, во сараевскиот басен се задржани честички од прашина и штетни гасови произведени од голем број стари автомобили, како и илјадници огништа во станбените згради каде за греење се користат цврсти горива.

Според достапните податоци, во Сараево се регистрирани околу 160.000 автомобили, од кои 70 отсто се постари од 15 години или се на дизел.

Анализата што претходно ја објави Светска банка (СБ) содржи информации според кои загадувањето на воздухот во Босна и Херцеговина директно предизвикува 3.300 смртни случаи секоја година.