Британскиот премиер Риши Сунак се соочува со клучно гласање за неговиот предлог-закон за Руанда, откако двајца заменици-претседатели на конзервативците и еден министер поднесоа оставки за да се побунат поради ова прашање, пишува Би-Би-Си.

Во вторникот Ли Андерсон, Брендан Кларк-Смит и Џејн Стивенсон се повлекоа за да гласаат за промените за кои рекоа дека ќе го заострат законодавството. Како удар врз авторитетот на премиерот, 60 пратеници од ториевците ги поддржаа амандманите на бунтовниците. Даунинг стрит е убеден дека законот како целина сепак ќе се изгласа, но призна дека се подготвува да понуди отстапки.

Пратениците денес треба да продолжат со расправата за предложените измени на законодавството, со кои се обидуваат да ги одвратат премините со оживување на планот на владата да испрати неколку баратели на азил во Руанда.

Ако околу 30 пратеници од владејачката Конзервативна партија им се придружат на опозициските партии во гласањето против нацрт-законот на неговата последна пречка во парламентот, Сунак може да биде поразен. Досега многу малку конзервативни пратеници експлицитно се обврзаа да гласаат против законот.

Најмалку четворица конзервативни пратеници – вклучително и поранешните министри Роберт Џенрик и Суела Браверман – јавно рекоа дека се подготвени да гласаат против нацрт-законот доколку тој не се подобри. Но, не е јасно уште колку би можеле да им се придружат.

Британскиот министер за илегална миграција Мајкл Томлинсон изјави за Би-Би-Си дека бунтот на конзервативците против политиката е знак за „конструктивна и силна дебата“.

„Речиси секој човек, всушност секоја личност, која застана на наша страна, на конзервативната страна рече дека сака оваа шема да функционира“ објасни Томлинсон.

Томлинсон вели дека му е „многу жал“ што двајцата заменици-претседатели на партијата и еден пратеник поднеле оставки, но дека „секој од нив сака оваа политика да функционира“.

Доколку биде одобрен од пратениците, владата сè уште се соочува со предизвикот нацрт-законот да биде одобрен од лордовите, каде што најверојатно ќе наиде на дополнително противење.