Пораз на МЗТ Скопје на последниот натпревар во „меурот“ во Бања Лука
Кошаркарите на МЗТ Скопје претрпеа пораз од лидерот во АБА2 лигата, Студентски центар од 75:92 и со пораз го завршија настапот на вториот турнир кој се играше во „меур“ во Бања Лука.
„Металците“ играа одлично во првите три четвртини, но потклекнаа во последната која ја загубија со 16:29 и со тоа го одлучија победникот. Исто така, еден од клучните елементи за победникот беа загубените топки, играчите на МЗТ Скопје имаа дури 21.
Хасани Гравет беше најдобар во тимот на МЗТ Скопје со 21 поен, Андрија Бојиќ даде 13 поени и 3 скока, додека Дамјан Стојановски постигна 12 поени, додека во редовите на Студентски центар најпрецизен беше Славковиќ со 21 поен.
Кошаркарите на МЗТ Скопје на вториот турнир во АБА2 лигата остварија една победа, над Хелиос (70:69) и два порази, од Слобода Ужице (70:81) и Студентски центар (75:92) и се наоѓаат на делба од четвртото до осмото место со скор од четири победи и три порази. Вториот македонски претставник во АБА2 лигата, Работнички, поради коронавирус во тимот, не настапи на турнирот во Бања Лука и своите натпревари ги загуби со службени 0:20.