Поранешниот пратеник на десничарската ХДЗ, освојувач на олимписки медал во бокс и експретседател на автоклубот „Сигет“ – Дамир Шкаро, е осуден на две и пол години затвор за силување и сексуално вознемирување на вработена во автоклубот, јавија хрватските медиуми.

Покрај затворската казна, Шкаро ќе треба да плати и 3.787 евра за судските трошоци и вештачења, а во казната е вклучено и времето поминато во притвор од почетокот на септември до крајот на октомври 2019 година.

Шкаро се бранеше на слобода од обвинувањата, откако беше ослободен од истражниот затвор на 24 октомври 2019 година. Притворот му беше одреден поради ризик да влијае врз сведоци и да го повтори делото.

Тој беше уапсен во септември таа година на граничен премин со Босна и Херцеговина.