Претседателот Стево Пендаровски денеска го прими Ханс Клуге, регионален директор на Светската здравствена организација за Европа. На средбата се разговараше за актуелната состојба со коронавирусот во земјава, како и за најновите информации за ситуацијата со овој вирус во светот.

Како што соопшти Кабинетот на претседателот, Клуге оцени дека нашата држава има добри капацитети и дека презема вистински чекори во подготвеноста за справувањето со коронавирусот.

– Тој посочи дека нема место за паника и дека е значајно граѓаните да се информираат од релевантни извори, за да не се дозволи создавање епидемија на лажни вести, со што се согласи претседателот Пендаровски. На средбата се разговараше и за состојбата со аерозагадувањето во нашата држава, при што претседателот Пендаровски рече дека негова заложба е овој проблем да се стави високо на агендите, посочувајќи го примерот со седницата на Советот за безбедност на која во присуство и на невладини организации се разговараше за аерозагадувањето како безбедносен ризик во државата, информира Кабинетот на Пендаровски.

На средбата со @hans_kluge, првиот човек на @WHO_Europe се согласивме дека граѓаните треба да се информираат од релевантни извори, за да не се дозволи создавање епидемија на лажни вести. Клуге оцени дека нашата држава презема вистински чекори за справувањето со коронавирусот. pic.twitter.com/ydeLMdszp5

— Stevo Pendarovski (@SPendarovski) February 28, 2020

Регионалниот директор на Светската здравствена организација за Европа, Ханс Клуге, е во посета на нашата држава по повод одржувањето на вториот национален форум за здравје, насловен „Здрави мајки, здрави новороденчиња: Северна Македонија одговара на предизвиците”, која ја организира Министерството за здравство со поддршка на Светската здравствена организација.