Пармезан со микрочип: Како Италијанците го заштитија својот бренд
Италијанскиот пармезан е едно од најпознатите сирења во светот, на кое постојано му се закануваат бројни имитации. Конкуренцијата со години произведува поевтини имитации на омилениот млечен производ Пармиџано Реџиано, најчесто користен за тестенини и салати во Италија, пишува „Си-би-ес њус“.
Затоа, производителите на овој вкусен деликатес најдоа нов начин да го заштитат својот производ. Здружението кое го надгледува производството на сирење, „Пармиџано Реџиано“(„Parmigiano Reggiano“), неодамна објави дека става микрочипови во декларацијата, како дел од својата борба против конкуренцијата.
Под посебна заштита поставена од ЕУ, Пармиџано Реџиано е единствениот вид на сирење во Европа, што може да се нарече пармезан и мора да се произведува во северниот дел на Италија, вклучувајќи ги Парма и Реџо Емилија.
Здружението се надева дека ќе го заштити својот бренд со оваа нова технологија. Микрочиповите се со големина на зрно сол и се вметнуваат во етикетите што се наоѓаат на кората од сирењето. Чиповите може да се скенираат со кју-ар код за храна.
„Благодарение на безбедносните дигитални етикети на ролните на нашите сирења, можеме да им гарантираме квалитет на нашите потрошувачи“, изјавил Никола Бертинели, претседател на здружението.
„Од своето основање во 1934 година, нашето здружение се обидува да го заштити својот производ од конкуренцијата, што пласира слични производи на пазарот, а не ги исполнува нашите строги критериуми поврзани со начинот на производство и потекло“, додал Беринтели.
Во САД, овој вид на сирење не е заштитен, па производителите на млечни производи од Висконсин, прават различни видови на сирење што го нарекуваат пармезан.
Здружението законски го спречи американскиот прехранбен гигант „Крафт Хајнц“ да го регистрира името „Крафт пармезан“ во Еквадор во 2022 година.