Отворен мост и граничен премин меѓу Босна и Србија
Денеска е отворен новоизградениот мост меѓу Братунац, во источна Босна и Херцеговина (БиХ) и Љубовија (Србија), со заеднички граничен премин и царински терминал меѓу двете земји.
Мостот и граничниот премин ги отворија министерот за врски и транспорт на Босна и Херцеговина, Војин Митровиќ и министерот за внатрешни работи на Србија, Александар Вулин. Изградбата на мостот чинеше 13 милиони евра, а беше финансиран од Србија. Мостот е долг 227 метри.
Изградбата на граничниот премин ја финансираше Босна и Херцеговина, а вредноста на проектот е 7,2 милиони евра.
Новиот граничен премин ќе биде заедничка локација на царинските и полициските власти на БиХ и Србија, прв од ваков вид во регионот, пренесува РСЕ.
Ова ќе биде меѓународен граничен премин од прв ред за овластена трговија со стоки кои се предмет на инспекција.
Преминот има три влезни и три излезни ленти и лента за велосипедисти.