Портпаролот на ДУИ и министер за надворешни работи, Бујар Османи, зборувајќи за незадоволството кај „огнената група“ во партијата, вечерва на телевизијата „21“ рече дека незадоволни се мал број на членови, кои „сакаат мислењата на малцинството да му го наметнат на мнозинството“.

Сепак, вели тој, во демократија се почитува мнозинството.

„Тие кои не гласале, немаат право да се жалат, тие кои дале поддршка, тие можат да барат одговорност и отчет. Замислете Али Ахмети да ги менува министрите бидејќи така му текнало некому, на една група им текнува да ги сменат одлуките на мнозинството, тоа веќе не е институција, ДУИ е сериозна партија, ние ја потценуваме вредноста на оваа политичка организација која 20 години бележи неверојатни победи“, рече Османи.

Од друга страна, Изет Меџити, неформалниот предводник на „огнените“, смета дека Али Ахмети е „под нечие влијание“.

Меџити додаде и дека Османи за него не е партиски координатор за Чаир, бидејќи, како што вели, таква функција во статутот на ДУИ би создала дуализам и раздор во огранокот. Ахмети пред две недели го постави Османи на новата функција во Чаир, кој традиционално е бастион на Меџити.