Шефкет Демировски, македонски бизнисмен и газда на компанијата АТС Груп од Скопје, кој од ноември во 2019 година е во притвор во Србија како осомничен за поткуп во аферата „Први партизан“ од Ужице, неофицијално се спогодил со српското Обвинителство, пренесува „Новости“.

Како што објавува медиумот, на Демировски му бил вратен пасошот по што тој заминал за Истанбул каде живее неговото семејство, откако тој платил 250.000 евра.

Демировски беше уапсен во ноември во 2019 година, заедно со Боривое Глишовиќ, вработен во „Први партизан“, под сомнение дека за кражба на документација за производство на муниција во фабриката.

Според „Новости“, Демировски и Глишовиќ се товарат дека извршиле кривични дела преку продажба на документи и проекти во сопственост на „Први партизан“ за производство на муниција и оружје со калибар од 12,7 мм.

Во истрагата против нив што траеше неколку месеци беа вклучени српската полиција и разузнавачките агенции ВБА и БИА.