Горан Самарџиев (43) го презеде тренерското место во КК Работнички од Димитар Мираковски, по лошиот старт на сезоната на најтрофејниот што не одговара на високите амбиции и на засилениот тим.

Во домашното првенство по пет кола Работнички има три победи и два порази, а од Самарџиев се очекува да иницира пресврт, за тимот да биде конкурентен за освојување на домашните титули.

– Работнички и пред да дојдам јас на чело, имаше највисоки цели, а тие се напад на титулите на домашната сцена. Во таа смисла ништо не е променето. Тимот е квалитетен и има шанси да ги оствари своите цели. Имаме тековни проблеми со повредени и со суспензии, но ќе ги надминеме и ќе ги подобриме резултатите. Треба да се има предвид дека Работички има значително подновен тим и ќе биде потребно одредено време да се воиграме максимално, играчите да ги примат моите идеи и да функционираме како што посакуваме. Сметам дека тоа е остварлива работа – вели Самарџиев.

Според него уште некои тимови рефлектираат на висок пласман на домашната сцена, МЗТ Скопје Аеродром, Пелистер и Еуро Никел.

– Предноста на МЗТ Скопје Аеродром е во тоа што основата на тимот се домашни играчи кои долго време функционираат заедно, воиграни се и не им треба време во таа смисла. Квалитетот на Работнички е несомнен, но ни треба одредено време за воигрување. Според мене и Пелистер има тим за највисоки дострели на домашната сцена, а слично може да се каже и за Еуро Никел – вели Горан, кој дојде од Словачка (Комарно), за тука да ја преземе тренерската палка.

Тој како играч со Работнички освои шест првенствени титули, четири купа…

– Кај мене немаше дилема ни за час, секогаш сакав да се вратам во Работнички. Знаејќи ја мојата историја со овој клуб, тоа не е чудно. Како играч, бев дел од Работнички во неговите најуспешни сезони, имам многу титули, тоа остава неизбришлива трага. Младите тренери главно сонуваат за големи европски клубови, а јас сонував дека еден ден ќе застанам на кормилото на Работнички. Нераскинливо сум врзан за овој клуб и не се двоумев воопшто да прифатам да му станам тренер – вели Горан.

Tој има свој став околку бројот на странските играчи во нашето првенство.

– Секогаш сум за македонските играчи. Бројот на странци на паркетот сезонава е зголемен и просторот на домашните играчи е стеснет. Меѓутоа не мислам дека е тоа главниот проблем. Треба да играат квалитетните, без разлика од каде се. И во другите европски лиги бројот на странци е голем. Прва лига со 12 тима кај нас е премногу. Се разводнува квалитетот. Оптимално би била бројка од 10 тима во Првата лига. Со тоа второлигашкото друштво би добило во квалитет и македонските играчи таму би имале ефектни минути на паркетот, наместо да бидат во прволишко друштво, а да седат на клупата – смета кормиларот на Работнички.

Тој ќе дебитира в недела во меч против Евро Никел од Кавадарци, средина од каде потекнува.

– Судбината сака во првиот меч да се сретнам со мојот матичен клуб на спротивната страна. Секако, сентименталности нема да има. Кај нас, двајца важни играчи ќе отсуствуваат. Џелетовиќ е повреден, а Декоси е суспендиран. Секако, ќе влеземе во тој дуел максимално мотивирани и подготовени – вели Самарџиев.