Научниците од неодамна отворениот Институт за ран рак на Универзитетот Кембриџ почнаа да работат на утврдувањето на промените во клетките многу години пред тие да се развијат во тумори, а тоа истражување треба да помогне во дизајнирањето на радикално нови начини за лекување на ракот, пишува „Гардијан“.

Институтот за ран рак, кој штотуку доби 11 милиони фунти од анонимен донатор, е фокусиран на пронаоѓање начини за справување со туморите пред тие да предизвикаат симптоми.

Истражувањето ќе ги искористи неодамнешните откритија кои покажаа дека многу луѓе развиваат претканцерозни состојби кои се во мирување во текот на долги периоди.

– Латентацијата за развој на ракот може да трае со години, понекогаш и една или две децении, пред состојбата нагло да се манифестира кај пациентите – рекла професорката Ребека Фицџералд, директорка на Институтот.

Според нејзините зборови, потребен е поинаков пристап, со кој може рано да се открие лице кое е изложено на ризик од рак, користејќи тестови кои можат да се дадат на голем број луѓе.

Сунѓер што се голта

Еден од примерот е цитосунѓерот, сунѓер на жица, кој го развија Фицџералд и нејзиниот тим.

Тој се голта како таблета, се шири во стомакот и потоа се повлекува во хранопроводникот собирајќи ги  клетките на хранопроводникот по пат.

Оние клетки што содржат протеин наречен ТФФ3, кој се наоѓа само во претканцерозните клетки, даваат рано предупредување дека пациентот е во опасност рак на хранопроводникот и дека треба да се следи.

Што е најважно, овој тест може да се примени едноставно и во широк обем.

Еден од пристапите на Институтот се фокусира на примероците од крв.

Примероци од крв давале жени кои поминале скрининг за рак на јајчниците и се чувани во посебни простории за складирање, а Институтот сега ја променил намената на овие примероци.

– Имаме околу 200.000 такви примероци и тие се златен рудник – рекол Џејми Бландел, водач на истражувачката група во Институтот.

Користејќи ги овие примероци, истражувачите идентификувале промени кои ги разликуваат оние донатори на кои подоцна им бил дијагностициран рак на крвта 10 или дури 20 години по давањето на примероците, од оние кои не развиле такви состојби.

– Откривме дека постојат јасни генетски промени во крвта на една личност повеќе од една деценија пред да почнат да се покажуваат симптомите на леукемија – рекол Блундел.

Според неговите зборови, ова покажува дека постојат низа можности кои можат да се искористат за да се интервенира и дали да се обезбедат третмани кои ќе ги намалат шансите за добивање рак.