Никовски за СП: Некој има намери пак да крои граници
Поранешниот амбасадор Ристо Никовски вели дека се уште не е јасно кој и зошто го пласирал нон-пејперот што деновиве го бранува Балканот, но неговото појавување не е случајно.
– Не е јасно дали се работи за испитување на расположението на Балканот или е конкретна намера нешто да се превземе. Дека такви намери има, не треба да има сомнежи, бидејќи е очигледно дека БиХ е нефункционална држава и ако вака продолжи кога-тогаш ќе експлодира. Косово е сепак полесно прашање од БиХ, иако изгледа контарверзно. Ваков дефинитивен расплет на пост-Југославија ќе доведе до нови војни, како што покажуваат реакциите во регионот – вели Никовски за „Слободен печат“.
Во врска со импликациите врз Македонија од еден ваков не-документ Никовски изнесе интересна теза:
– За Македонија е многу подобро северниот дел на Косово, општините околу Косовска Митровица да се вратат во Србија, која на тој начин ќе добие сатисфакција и со тоа ќе се заврши нелегалното отцепување. Формирањето на некаква заедница на српски општини во рамките на Косово, што ќе значи српска држава на Косово, неизбежно ќе води до слични комбинации и формирање на заедници и кај нас, што ќе значи федерализација на Македонија. Албанија и Косово неформално се една држава и понатаму ќе има се повеќе потези во таа насока. А самото обединување не им одговара ниту на Тирана, ниту на Приштина. За нив е подобро да бидат одвоени ентитети на регионален и на меѓународен план, затоа што ќе бидат една држава со два гласа – вели Никовски.