Велешките пожарникари вчера имале несекојдневна акција, откако биле повикани да спасат мало маче. Откако граѓаните не успеале сами да симнат малото маче кое на видеото се гледа како стои на жици од бандера на улицата „Кумановска“, преку фејсбук-објава на здружението за заштита на животните „Гласот на животните“ од Велес, активистите ги повикале пожарникарите да им помогнат во целта.

Набрзо, од здружението објавија уште едно видео, на кое се гледа како пристигнува возилото на противпожарната служба, а потоа и како пожарникарите му пристапуваат на мачето:

Откако пожарникар му се доближи на мачето за да го спаси, се испостави дека мачето не било опасно заглавено, но сепак, од здружението беа импресионирани од брзата реакција на службата, нарекувајќи ги херои: „За среќа не беше заглавено! Ние сме многу позитивно изненадени од брзата реакција на Противпожарната екипа од Велес, Вие сте херои! Има капка надеж за нас! Фала ви од срце!“, напишаа велешките активисти од „Гласот на животните“.